काठमाडौं । नेपाल डेमोक्र्याटिक लयर्स एशोसिएसन डीएलए नेपाललाई विधानसंवत रुपमा चलाउन पूर्व अध्यक्ष यदुनाथ खनालले माग गरेका छन् । उनले डीएलए विधान विपरित गएकाेले तत्काल डीएलएकाे वैठक बसेर समस्याकाे समाधान गर्न उनले सुझव दिएका छन । उनले भनेका छन् :

नेपाल डेमोक्र्याटिक लयर्स एशोसिएसन (डीएलए) सम्पूर्ण लोकतन्त्रवादी कानुन व्यवसायीहरुको आस्था र धरोहरको प्रतीक हो । स्वतन्त्र र सक्षम न्यायपालिका स्थापित गर्न, एकतन्त्री एवं अधिनायकवादी विचार, व्यवस्था र प्रवृत्तिका विरुद्ध कानुन व्यवसायीहरुलाई संगठित गरी विधिको शासन तथा लोकतान्त्रिक प्रणालीको स्थापनामा प्रयत्नशील रहने उद्देश्य रहेको छ

यसै उद्देश्यका खातिर राष्ट्रियता, लोकतन्त्र, समाजवादका मूल्य मान्यता तथा प्रक्रिया एवं मानव अधिकार, कानुनको शासन र सामाजिक न्यायको सिद्धान्तप्रति प्रतिबद्ध कानुन व्यवसायीहरुको साझा प्रतिनिधि संस्थाको रुपमा २०४७ साल मंसिर ५ गते यसको स्थापना भएको हो । यस संस्थाको स्थापनापछि जीवन्तता दिने सम्बन्धमा धेरै कानुन व्यवसायी साथीहरुको रगत र पसिना बगेको छ । आज देशका सबै जिल्लाहरुमा र सम्पूर्ण अदालतहरुमा संगठित र सबल डीएलए एकाई रहनु गौरबको विषय हो ।

नेपाल डेमोक्र्याटिक लयर्स एशोसिएसनको विधान २०४७ को धारा १७(२८) मा यस एशोसिएसनको तर्फबाट नेपाल बार एशोसिएसनमा भाग लिने उम्मेदवार छनोट गर्न एक छनोट समिति गठन गरि उमेदवारहरु छनोट गरिने वैधानिक ब्यबस्था छ । सो व्यवस्थाका विपरित डीएलए नेपाल केन्द्रीय कार्यसमितिले गठन गरेको १३ सदस्यीय उम्मेदवार छनोट समितिलाई जबर्जस्ती गरि उम्मेदवार छनोट गर्न नै नदिई बाहिरबाट नै उमेदवार छनोट भए गरिनु दुर्भाग्यपूर्ण छ ।