काठमाडौँ । औषधि व्यवस्था विभागले अनलाइन तथा सामाजिक सञ्जालमार्फत हुने औषधिजन्य उत्पादनहरूको अनियन्त्रित विज्ञापन र बिक्री सम्बन्धमा ध्यानाकर्षण भएको जनाएको छ ।
विभागले हाल फेसबुक, टिकटक जस्ता प्लेटफर्ममार्फत मधुमेह, मोटोपन, प्रोस्टेट, युरिक एसिड, थाइरोइड, यौन शक्ति वृद्धिजस्ता विषयमा औषधिजन्य उत्पादनहरूको भ्रामक विज्ञापन भइरहेको भन्दै गम्भीर चिन्ता व्यक्त गरेको छ।
विभागले जानकारी गराएअनुसार, यी उत्पादनहरू वैज्ञानिक परीक्षणबिना नै प्रचार गरिएको छ, जसका कारण जनस्वास्थ्यमा गम्भीर असर पर्ने जोखिम छ। विशेष गरी Garcinia Cambogia नामक पदार्थको सेवनले Lead Poisoning, पेट दुखाइ, कब्जियत जस्ता गम्भीर स्वास्थ्य समस्याहरू देखिएको रिपोर्ट गरिएको छ। त्यस्तै, यौन शक्ति वृद्धिका नाममा अनधिकृत रूपमा बेचिने औषधिहरूमा Sildenafil मिसाइएको हुन सक्ने बताइएको छ, जसको अत्यधिक प्रयोगले मृत्यु समेत हुनसक्छ।
औषधि व्यवस्था विभागले आम नागरिकलाई अनलाइन विज्ञापनमा आएर वैज्ञानिक परीक्षणबिना बिक्री गरिने औषधिहरूको प्रयोग नगर्न आग्रह गर्दै, यस्ता सामग्रीहरू बिक्री गर्नेलाई कानुनी कारबाही गरिने चेतावनी दिएको छ। साथै, स्वास्थ्यकर्मी, औषधि विक्रेता, अस्पताल, र सरोकारवालाहरूलाई जनचेतना अभिवृद्धि गर्न आह्वान गरिएको छ।
