काठमाडौं । नेपाल ल क्याम्पसमा भएको स्ववियु निर्वाचनमा अनेरास्ववियुका उम्मेदवार समिर रिजाल अध्यक्षमा निर्वाचित भएका छन्। रिजालको जितसँगै अनेरास्ववियु र अखिल क्रान्तिकारीबीचको गठबन्धनले संयुक्त रूपमा प्रभावशाली उपस्थिति देखाएको छ, यद्यपि सचिव र कोषाध्यक्ष पद भने नेविसंघले हात पार्न सफल भयो।
अध्यक्ष पदका लागि भएको प्रतिस्पर्धामा रिजालले ८७१ मत प्राप्त गर्दै विजयी भए। उनका निकटतम प्रतिस्पर्धी, नेविसंघका मोहम्मद माजिद प्रवेजले ७५७ मत प्राप्त गरे भने तेस्रो स्थानमा रहेका प्रदीप विकले १७ मत मात्र पाए।
यद्यपि, सचिव पदमा भने नेविसंघले अग्रता कायम राख्यो। नेविसंघका मनमोहन भट्ट ८२९ मतका साथ विजयी भए। उनलाई पछ्याउँदै अखिल क्रान्तिकारीका ओमप्रकाश सुनारले ८१२ मत पाए।
कोषाध्यक्ष पदमा पनि नेविसंघले जित दर्ता गर्यो। नेविसंघकी उम्मेदवार विधिशा मिश्राले ८६४ मत प्राप्त गर्दै अनेरास्ववियुका आशुतोषकुमार गुप्तालाई (७७९ मत) पछि पारिन्।
यस पटकको निर्वाचनमा अनेरास्ववियु र अखिल क्रान्तिकारीबीच गठबन्धन थियो भने नेविसंघले एकल रूपमा प्रतिस्पर्धा गरेको थियो। निर्वाचनको नतिजाले क्याम्पस राजनीतिमा गठबन्धनको रणनीति आंशिक रूपमा सफल देखाएको छ।
