काठमाडौँ । नवनियुक्त कानुन न्याय तथा संसदीय मामिलामन्त्री अजय कुमार चौरसियाले न्याय क्षेत्रमा देखिएका समस्याहरू समाधान गर्नका लागि कानुन बमोजिम आवश्यक सुधार गर्न आफू तयार रहेको जानकारी दिनु भयो ।
मङ्गलबार न्यायपालिकाको पाँचौँ पञ्चवर्षीय योजनाको सार्वजनिकीकरण कार्यक्रमलाई उद्घाटन गर्दै मन्त्री चौरसियाले न्यायपालिकाले उच्चकोटीको न्याय सम्पादन गरिरहेको दाबी गरे ।
उनले भने, ‘नेपालको न्यायपालिका जसरी न्याय सम्पादन गरिरहेको छ त्यो उच्च कोटीको छ । आज म नेपालको कानुनमन्त्रीको नाताले माननीय श्रीमानहरुलाई के आश्वस्त पार्न चाहन्छु भने न्याय क्षेत्रमा भएका अप्ठ्याराहरूलाई कानुन बमोजिम आवश्यक सुधार गर्नका लागि म तयार छु । न्यायपालिका, व्यवस्थापिका र कार्यपालिकामा नेपालको संविधानले सन्तुलन मिलाउने काम गरेको छ । व्यवस्थापिकाले कानुन बनाउने, संशोधन गर्ने, कार्यपालिकाले त्यसको कार्यान्वयन गर्ने र ती कानुनहरू संविधान बमोजिम छन् कि छैनन् र कार्यपालिका उच्छृंखल हुनबाट रोक्न कानुन पालन गराउने न्यायपालिका हो ।’ न्यायपालिकाले लोकतन्त्रलाई थप सुदृढ बनाउन सहयोग गरेको चौरसियाको भनाइ छ ।