काठमाडौं । अमेरिकरी राष्ट्रपति डोनाल्ड ट्रम्पलाई सपथ लिनु अगाडि नै अदालतको फैसला सुनाउने तयारीले अप्ठ्यारो पर्ने देखिएको छ । राष्ट्रपति पदको शपथ लिनुभन्दा १० दिन अगाडि एउटा मुद्दामा अदालतले निर्णय सुनाउने तयारी अमेरीकी अदालतले गरेको छ ।
ट्रम्पले यही जनवरी २० मा पद तथा गोपनीयताको शपथग्रहण गर्दैछन् । त्यसको १० दिन अगाडि न्यूयोर्क अदालतले ट्रम्पलाई सजायँ सुनाउने तयारी गरेको हो ।
न्यूयोर्कका न्यायाधीश ह्वान मर्चनले डोनाल्ड ट्रम्पविरुद्ध मुख नखोल्न पैसा दिएको सम्बन्धी मुद्दामा फैसला सुनाइने बताएका हुन् ।
ट्रम्पलाई जेलमा पठाउने वा जेल बाहिर राखेर चालचलन सुधार्न मौका दिने वा जरिवाना तोक्ने वा निःसर्त छोड्नेबारे अदालतबाट निर्णय हुने संकेत ती न्यायाधीशले गरेको बीबीसीले जनाएको छ ।
यदि अदालतले सजायँ सुनाएमा कानुनी रुपमा दोषी व्यक्तिको रुपमा ट्रम्प ह्वाइटहाउस प्रवेश गर्नेछन् । यद्यपि उनलाई अदालतको फैसलामा पुनरावेदन गर्ने विकल्प भने बाँकी रहने बताइएको छ ।
ट्रम्पले भने न्यूयोर्क अदालतको यो तयारीलाई अवैध राजनीतिक हमला भनेर आलोचना गरेका छन् । अदालतको तयारीबारे प्रतिक्रिया दिने क्रममा ट्रम्पले त्यसलाई बदनियतपूर्ण समेत भनेका छन् ।
ट्रम्प पक्षले न्यायाधीशको कदमको आलोचना गर्दै उक्त मुद्दा तत्काल खारेज हुनुपर्ने बताएको छ । ट्रम्पका प्रवक्ताले कुनै अवरोध विना ह्वाइटहाउस प्रवेश गर्न दिन र राष्ट्रपतीय शक्ति हस्तान्तरण गर्न भनेका छन् ।
यस्तो थियो मुद्दा
सन् २०१६ को चुनावअघि पूर्वपोर्नस्टार स्टोर्मी ड्यानल्ससँग ट्रम्पको यौन सम्बन्ध रहेको विषय सार्वजनिक भएको थियो ।
त्यसपछि यो विषयमा उनलाई चुप लगाउन ट्रम्पले १ लाख ३० हजार अमेरिकी डलर दिएको आरोप लागेको थियो । यो कसुरमा ट्रम्प दोषी ठहरिएका थिए । ट्रम्पले भने उक्त आरोप अस्वीकार गर्दै आफूले गलत काम नगरेको जिकिर गर्दै आएका छन् ।
सन् २०२४ को चुनाव प्रचार अघि यी सहितका अन्य फौजदारी अभियोगको सामना ट्रम्पले गर्नुपरेको थियो । त्यतिबेला उनले आफूलाई राष्ट्रपतिको निर्वाचनमा रोक्ने उद्देश्यले गलत आरोपहरु लगाइएको टिप्पणी गर्दै आएका थिए ।
यद्यपि उनी सन् २०२४ मा राष्ट्रपति पदको निर्वाचनमा विजयी भएका थिए । उनले केही पदहरुमा नियुक्ति समेत गरिसकेका छन् ।