काठमाडौँ । रत्न राज्यलक्ष्मी क्याम्पस (आरआर)मा स्ववियु निर्वाचनको माग गर्दै उच्च अदालत पाटनमा रिट निवेदन दायर भएको छ ।
नेविसंघको तर्फबाट स्ववियु अध्यक्षमा उम्मेदवार बनेका विनोदराज जोशीले अदालतमा निवेदन दर्ता गराएका हुन् । उनले स्ववियु निर्वाचनका लागि परमादेश लगायतको आदेश जारी गरिदिन अनुरोध गरेका छन् । उनले त्रिभुवन विश्वविद्यालय र आरआर क्याम्पसलाई विपक्षी बनाएर रिट दायर गरेका हुन् ।
विभिन्न बहानामा आरआर क्याम्पसको स्ववियु निर्वाचन अनिश्चित बनेको भन्दै निर्वाचनको सुनिश्चितताका लागि अनुरोध गरेका हुन् ।
सम्पूर्ण निर्वाचन प्रक्रिया सकिए पनि मतदान हुन नसक्नुले क्याम्पसका गतिविधिमा आरआरका विद्यार्थीको प्रतिनिधित्व गराउन पाउने अभिलाषा तुहिएको उनले भनेका छन् ।