काठमाडौं । नेपाल बार एशोसिएसनको २७औं केन्द्रीय कार्यसमितिको नयाँ नेतृत्व चयनका लागि देशभर मतदान सुरु भएको छ।
आज बिहान ८ बजेबाट सुरु भएको मतदान प्रक्रिया बेलुकी ४ बजेसम्म सञ्चालन हुनेछ। प्रमुख निर्वाचन अधिकृत वरिष्ठ अधिवक्ता रामकृष्ण निरालाका अनुसार बारको नेतृत्व चयनका लागि अधिवक्ताहरू उत्साहपूर्वक मतदानमा सहभागी भइरहेका छन्।
अध्यक्ष पदका लागि दुई ठूला समुहबीच कडा प्रतिस्पर्धा देखिएको छ। बृहत लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्रा. डा. विजयप्रसाद मिश्र र व्यावसायिक कानुन व्यवसायी समूहबाट वरिष्ठ अधिवक्ता रमनकुमार श्रेष्ठ प्रतिस्पर्धामा छन्।
महासचिव पदमा डा. मिश्रको प्यानलबाट वरिष्ठ अधिवक्ता केदारप्रसाद कोइराला र श्रेष्ठको प्यानलबाट अधिवक्ता यज्ञमणि न्यौपानेले उम्मेदवारी दिएका छन्।
देशभर ३६ मतदान केन्द्र स्थापना गरिएको छ। काठमाडौँको मुख्य मतदान केन्द्र सर्वोच्च अदालत परिसरमा रहेको छ । कुल ९ हजार ९५७ अधिवक्ताले नयाँ नेतृत्व चुन्नेछन् भने २५ पदका लागि ५७ उम्मेदवार चुनावी मैदानमा छन्।
