काठमाडौं । काठमाडौं महानगरपालिकाले कुकुर तथा बिरालोको चोरी, हराएको र सडकमा छाडिएको गुनासो बढेसँगै अब माइक्रोचिप राखी नगर कार्यालयमा दर्ता गरेर मात्र पाल्न पाइने व्यवस्था लागू गर्ने भएको छ।
काठमाडौं महानगरपालिका क्षेत्रभित्र अबदेखि कुकुर वा बिरालो पाल्न चाहनेले अनिवार्य रूपमा माइक्रोचिप राखेर सम्बन्धित वडा कार्यालयमा दर्ता गर्नुपर्नेछ। चोरी, हराएको र सार्वजनिक ठाउँमा छाडिएको कुकुररबिरालाका बारेमा लगातार गुनासो आएपछि महानगरले यस्तो निर्णय लिएको हो।
यसका साथै, महानगर क्षेत्रभित्र वा बाहिर कुकुर वा बिरालो बिक्री तथा वितरण गर्ने व्यक्ति वा संस्थाले पनि माइक्रोचिप राखेर मात्र वितरण गर्नुपर्ने महानगरले स्पष्ट पारेको छ।
महानगरले जनावरको दर्ता तथा पहिचान प्रणालीलाई प्रभावकारी बनाउन यो व्यवस्था अनिवार्य गर्ने तयारी गरेको हो। जनावरको व्यवस्थापनमा देखिएको चुनौती समाधान गर्न यस कदमले टेवा पुग्ने अपेक्षा गरिएको छ।