काठमाडौं । नेपाल बार एशोसिएसनको २७औं केन्द्रीय कार्यसमितिको नयाँ नेतृत्व चयनका लागि आज भएको मतदान सम्पन्न भएको छ। आज बिहान ८ बजेबाट सुरु भएको मतदान प्रक्रिया बेलुकी ४ बजेसम्म सम्पन्न भएको हो।
अध्यक्ष पदका लागि दुई ठूला समुहबीच कडा प्रतिस्पर्धा देखिएको छ। बृहत लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्रा. डा. विजयप्रसाद मिश्र र व्यावसायिक कानुन व्यवसायी समूहबाट वरिष्ठ अधिवक्ता रमणकुमार श्रेष्ठ प्रतिस्पर्धामा छन्।
महासचिव पदमा डा. मिश्रको प्यानलबाट वरिष्ठ अधिवक्ता केदारप्रसाद कोइराला र श्रेष्ठको प्यानलबाट अधिवक्ता यज्ञमणि न्यौपानेले उम्मेदवारी दिएका छन्।
देशभर ३६ मतदान केन्द्र स्थापना गरिएको थियो । कुल ९ हजार ९५७ अधिवक्ताले नयाँ नेतृत्व चुन्नेछन् भने २५ पदका लागि ५७ उम्मेदवार चुनावी मैदानमा छन्।