काठमाडौं । अख्तियार दुरुपयोग अनुसन्धान कार्यालयले सेवाग्राहीबाट लिएको एक लाख रुपैयाँ घुससहित नापी कार्यालय कलंकीका सर्भेक्षकसहित २ जनालाई मंगलबार नियन्त्रणमा लिएको छ ।
सेवाग्राहीसँग घुस मागिरहेको भन्ने सूचनाका आधारमा अख्तियारले स्टिङ अपरेसन गर्दा नापी कार्यालय, कलंकीका सर्भेक्षक लक्ष्मी प्रसाद चौलागाई र लेखापढी कर्मचारी नेत्रमणी पोखरेललाई पक्राउ गरेको हो ।
उनीहरुको साथबाट घुसबापत् लिएको एक लाख रुपैयाँ रकम समेत बरामद गरिएको अख्तियारका प्रवक्ता नरहरि घिमिरेले जानकारी दिए ।
उनका अनुसार जुम्ला घर भई हाल बुढानीलकण्ठ बस्दै आएका चौलागाईको साथबाट ४५ हजार रुपैयाँ बरामद भएको थियो । त्यस्तै, लेखापढी कर्मचारी पोखरेलका साथबाट ५ हजार र उनको कार्यालयको घर्राबाट ५० हजार रुपैयाँ रकम बरामद भएको छ ।