काठमाडौं । प्रहरी कुटेको आरोपमा स्याङ्जामा प्रहरीले तीन जनालाई पक्राउ गरेको छ। प्रहरीलाई कुटपिट गरेको आरोपमा वालिङ १२ कोखेका २८ वर्षीय रविन गुरूङ, २५ वर्षीय काजी गुरूङ र २४ वर्षीय सुदिप गुरूङ पक्राउ परेका हुन।
शनिबार राति साढे १० बजे वालिङ नगरपालिका वडा नम्बर १३ बायाँटारीमा मादक पदार्थ सेवन गरी दुई पक्षबीच झडप भएको भन्ने खबर आएपछि प्रहरी चौकी थुमपोखराका प्रहरी सहायक निरीक्षक मनोज सिंहसहित तीन जनाको टोली त्यसतर्फ गएको थियो। घटनास्थल पुगेको प्रहरीले सम्झाउन खोज्दा उनीहरुले प्रहरी माथि नै कुटपिठ गरेका थिए । प्रहरीका अनुसार कुटपिटबाट प्रहरी सहायक निरीक्षक सिंह घाइते भएका छन् । उनको गण्डकी मेडिकल कलेज पोखरामा उपचार भइरहेको छ।
प्रहरीमाथि कुटपिट गर्नेलाई पक्राउ गरि अनुसन्धान भइरहेको बताइएको छ ।