काठमाडौँ । पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेविरुद्ध जिल्ला अदालत कास्कीमा सहकारी ठगी र सम्पत्ति शुद्धीकरणको आरोपमा मुद्दा दर्ता भएको छ। सरकारी वकिलको कार्यालयले लामिछानेसहित पाँचजनालाई संगठित अपराधअन्तर्गत सहकारी ठगी गरेको आरोप लगाएको छ।
उनीहरूलाई पोखरास्थित सूर्यदर्शन सहकारीको रकम हिनामिना गरी गोर्खा मिडिया प्रा।लि।मा लगानी गरेको अभियोग लागेको छ। सो मुद्दामा करिब १ अर्ब ५१ करोड रुपैयाँ विगो माग गरिएको छ।
अनुसन्धानमा प्रहरीले लामिछानेसँग जोडिएका चेकहरू प्रमाणको रूपमा पेश गरेको छ। यद्यपि, लामिछानेले सहकारीको ठगीमा आफ्नो संलग्नता अस्वीकार गर्दै आएका छन्।
यस प्रकरणमा सहकारीका अध्यक्षदेखि अन्य पदाधिकारीसमेत संलग्न भएको आरोप लगाइएको छ। अदालतले थप सुनुवाइ र बयान प्रक्रिया अघि बढाउनेछ।
अभियोग लागेका कारण मात्रै भने उनको पद अप्ठेरोमा पर्दैन । तर लामिछानेमाथि लागेको आरोप पुष्टि भए सांसद पदमा पनि असर पर्न सक्नेछ। संविधानको धारा ८७ मा योग्यता पुगेको कुनै पनि सांसद संघीय कानून अनुसार अयोग्य नभएसम्म पदमा बहाल हुने व्यवस्था छ । प्रतिनिधिसभा नियमावलीको नियम २४८ मा तीन वर्षभन्दा बढी कैद सजाय हुने फौजदारी अभियोगमा मुद्दा दायर भएर थुनामा रहेमा सांसद निलम्बित हुने व्यवस्था गरेको छ ।