काठमाडौं । उपभोक्ता अदालत, त्रिपुरेश्वर, काठमाडौंले मेलमिलापकर्ताका रूपमा सूचीकृत हुन इच्छुक योग्य व्यक्तिहरूका लागि आवेदन खुला गरेको छ। अदालतले जिल्ला अदालत नियमावली, २०६९ को नियमअनुसार मेलमिलाप प्रक्रियामा संलग्न हुन चाहने व्यक्तिहरूबाट निवेदन माग गरेको हो।
मेलमिलापकर्ताका रूपमा सूचीकृत हुनका लागि आवेदक नेपाली नागरिक हुनुपर्नेछ र कम्तीमा २५ वर्ष उमेर पूरा गरिसकेको हुनुपर्छ। साथै, मान्यता प्राप्त शैक्षिक संस्थाबाट स्नातक तह उत्तीर्ण गरेको हुनुपर्ने, मेलमिलापसम्बन्धी तालिम लिएको प्रमाणपत्र पेस गर्नुपर्ने, र नेपालमा स्थायी ठेगाना भएको व्यक्तिले मात्र आवेदन दिन पाउने व्यवस्था गरिएको छ। नैतिक पतनसम्बन्धी कुनै फौजदारी अभियोगमा अदालतबाट सजाय नपाएको हुनु पर्ने र मेलमिलाप सम्बन्धी ऐन, २०५६ विपरीत कुनै कार्य नगरेको व्यक्ति मात्र योग्य ठहरिनेछ।
इच्छुक व्यक्तिहरूले नागरिकताको प्रतिलिपि, शैक्षिक योग्यताको प्रमाणपत्र, तालिमको प्रमाणपत्र, दुई प्रति पासपोर्ट साइज फोटो तथा मेलमिलाप सम्बन्धी कार्य गर्न इच्छुक संस्थाका लागि संस्थागत स्वीकृत कागजातसहित तोकिएको समयमा निवेदन दिनुपर्नेछ।
अदालतले मेलमिलाप प्रक्रियालाई थप प्रभावकारी बनाउने उद्देश्यले योग्य र सक्षम व्यक्तिहरूको आवेदन संकलन गर्न सूचना जारी गरेको जनाएको छ।
