सुर्खेत । उच्च अदालत बार एशोसिएशन सुर्खेत र सुर्खेत जिल्ला अदालत बार एशोसिएशनले एक संयुक्त प्रेस विज्ञप्ति जारी गर्दै न्यायिक स्वायतता, मानव अधिकार र लोकतन्त्रको संरक्षणका लागि सदैव प्रतिबद्ध रहँदै न्याय प्रणालीको सुधार र जनआस्थामा वृद्धि गर्ने प्रयास गर्दै आएको जनाएको छ।
प्रेस विज्ञप्तिमा, बार एशोसिएशनले न्यायालयमा हुने विकृति र विसंगतिको अन्त्यका लागि सम्पूर्ण कानूनी व्यवसायीहरूको महत्वपूर्ण भूमिका र पहरेदारीलाई महत्त्वपूर्ण ठहर गर्दै, न्यायिक प्रक्रियामा कुनै अवरोध उत्पन्न गर्नु वा न्यायालय प्रति भ्रम सिर्जना गर्नु गैरकानूनी र अस्वीकृत गर्न योग्य रहेको उल्लेख गरिएको छ।
आजको मिति २०८१।१२।२१ मा कर्तव्य ज्यान मुद्दा (मुद्धा नं. 081-RE 0106 र 081-RE 0107) का सम्बन्धमा, उच्च अदालत सुर्खेतको मुलढोकामा केही व्यक्तिहरूले भिड जम्मा गरी न्यायालय प्रति भ्रम र अनास्था फैलाउने र सेवा प्रवाहमा अवरोध उत्पन्न गर्ने कार्य गरेको पाइएको छ। यसले न्यायिक प्रक्रियामा समेत विघ्न पुर्याउने खतरा उत्पन्न गरेको बार एशोसिएशनको भनाइ छ।
यसैक्रममा, बार एशोसिएशनले सबैलाई अपिल गर्दै भनेको छ कि कुनै पनि विवादको समाधान कानूनी प्रक्रियामा अनुसन्धान, अभियोजन, प्रमाण र बहसपछि मात्र हुने र यो प्रक्रियामा कुनै अवरोध पुर्याउनु न्यायिक प्रणालीको असफलता हुनेछ। साथै, न्यायालय परिसरमा भिड जम्मा गरेर अस्वभाविक गतिविधि बन्द गरेर न्यायिक प्रक्रियामा सहयोग पुर्याउन सबैलाई आह्वान गरिएको छ।
