काठमाडौं । नेपाल बार एशोसिएसनको २७औँ केन्द्रीय कार्यसमितिको नयाँ नेतृत्व चयनका लागि आज देशभरि मतदान हुँदैछ। कुल ९ हजार ९९७ मतदाताले बार एसोसिएसनको अध्यक्ष, उपाध्यक्ष, महासचिव, कोषाध्यक्ष तथा अन्य सदस्य पदका लागि मतदान गर्नेछन्।
यस पटकको निर्वाचनमा सत्तारूढ दलहरू नेपाली काँग्रेस, नेकपा एमाले र राप्रपा निकट कानुन व्यवसायीहरू एउटै प्यानलमा छन् भने विपक्षी गठबन्धनमा माओवादी केन्द्र, राष्ट्रिय स्वतन्त्र पार्टी -रास्वपा_ र एकीकृत समाजवादी रहेका छन्।
सत्तारूढ गठबन्धनले नेपाली काँग्रेस निकट डेमोक्रेटिक लयर्स एसोसिएसन, नेकपा एमाले निकट प्रोग्रेसिभ प्रोफेसनल लयर्स एसोसिएसन, तथा राप्रपा निकट राष्ट्रिय प्रजातान्त्रिक कानुन व्यवसायी सङ्गठनलाई समेटेर साझा उम्मेदवार चयन गरेको छ। यस प्यानलले अध्यक्ष पदका लागि वरिष्ठ अधिवक्ता विजयप्रसाद मिश्रलाई अघि सारेको छ भने महासचिव पदमा एमाले निकट केदार कोइरालाको उम्मेदवारी रहेको छ।
निर्वाचन प्रक्रिया बिहान ८ बजेबाट सुरु भई बेलुका ४ बजेसम्म चल्नेछ। मतदानका लागि देशभरि ३५ मतदान केन्द्र तोकिएका छन्। मतगणना प्रक्रिया मतदान सम्पन्न भएलगत्तै सुरु हुने अपेक्षा गरिएको छ।