काठमाडौं । प्लेटफर्म बिना सामाजिक सञ्जाल वा अन्य माध्यममार्फत मनपरी रूपमा गरिने अनलाइन व्यापारलाई कानुनी मान्यता नहुने भएको छ। वैशाख २ गतेदेखि लागू हुने नयाँ कानुनअनुसार, अब देखि अनलाइन व्यापार गर्न व्यवसाय दर्तासहित आफ्नो डिजिटल ‘प्लेटफर्म’ अनिवार्य तयार गर्नुपर्ने छ।
नेपाल सरकारले अनलाइन व्यापार नियमन गर्न ल्याएको नयाँ कानुन वैशाख २ गतेदेखि लागू हुँदैछ। यससँगै, अब वेबसाइट, मोबाइल एप वा अन्य अनलाइन प्रणालीजस्ता प्लेटफर्म बिना व्यवसाय सञ्चालन गर्न पाइने छैन।
व्यवसायीले वाणिज्य, आपूर्ति तथा उपभोक्ता संरक्षण विभागले बनाउने विद्युतीय व्यापार पोर्टलमा आफ्नो व्यापार दर्ता गरी सूचीकरण समेत गराउनुपर्नेछ। सामाजिक सञ्जालमार्फत गरिने व्यापारलाई भने कसरी नियमन गर्ने भन्ने प्रस्टता नियमावली बनेपछि आउनेछ।
तर, लघु तथा घरेलु उद्यमीले अरूको प्लेटफर्म प्रयोग गरेर अनलाइन व्यापार गर्न सक्नेछन्। त्यस्ता व्यापारीहरूले ग्राहकसँग लिखित वा डिजिटल सम्झौता गरी वस्तु तथा सेवा आपूर्ति गर्नुपर्नेछ।
समयमै सामान नपठाएको, गलत सामान पठाएको वा सेवा अनुरूप नपुगेको खण्डमा ग्राहकले फिर्ता गर्न पाउने अधिकार नयाँ कानुनमा सुनिश्चित गरिएको छ।
नेपालमा बढ्दो अनलाइन ठगी र अनियन्त्रित व्यापार गतिविधिलाई नियमन गर्ने उद्देश्यले सरकारले यो कानुन ल्याएको हो । यो कानुन संसदका दुवै सदनबाट पारित भई चैत ३ गते राष्ट्रपतिबाट प्रमाणीकरण भएको थियो।